一直想喺居住嘅區域跑長跑比賽，終於都等等到呢個機會，發現原來呢一個係個CLS嘅比賽。

其實康文署搞長跑比賽真係幾抵㗎，俾廿蚊抽籤成功，就可以參加同渣馬一樣規格嘅比賽。不過呢度係冇蕉食，冇水飲，更加無完賽獎牌，但係可以喺7:00起身，吃過早餐輕鬆去到會場攞牌布，然後一邊熱身，一邊等9:00開跑。

問心條路唔算好難跑，絕大部份係沿着麥理浩徑第十段嘅引水道跑，去到回程嘅時候有一組變態嘅斜路，個個都停晒腳行上去。好彩嗰度有一位賽事監察阿叔，不斷咁叫我哋上斜提腿，落斜全腳掌落地，咁就俾我輕鬆解決咗呢條問題。

最CLS係乜嘢？就係嗰度啲人好x勁。全個男子公開組得80幾位參加者（全場有200幾位參賽者），個個都4-5分pace，我用本來嘅速度跑肯定包尾，都幾大壓力。我跟住同我差唔多速度嘅人跑一段路，覺得ok先至扒頭佢。後尾嗰3公里真係靠意志力，直行又轉彎無數次未見終點跑到懷疑人生，結果就大約55分鐘完成（唔知有冇官方成績）。

我開始知道點解啲人咁想跑比賽想上跑班，佢哋要搵啱佢哋嘅兔仔朋友，一齊幫手超越成績。隨住年紀越嚟越大，應該求穩陣，還是繼續超越自己呢？

下次試吓慢跑到千島湖吧。