相隔多年買飛現場聽音樂，除咗好欣賞Eric Lu之外，仲有發現自己仲鍾意彈琴。

十年前追五年一度蕭邦比賽，Eric Lu係第一次參賽，佢嘅音色同其他參賽者好唔同，甚至覺得係蕭邦嘅轉世。當時幾希望佢攞冠軍，不過嗰屆由更屈機嘅趙成珍攞咗，Eric Lu只有緊頸四，嗰時我覺得佢嘅concerto先至係蕭邦本人嘅諗法。

上個月睇thread 先知道蕭邦比賽開始咗，嗰陣都求其聽吓啲選手彈琴，之後知道Eric Lu再次參賽，於是追埋一份（同期睇埋星星妹妹呂天瑤）。「十年磨一劍」，表面I到爆嘅Eric Lu 憑一首簡約嘅waltz告訴世人：蕭邦是這樣的。

知道佢攞冠軍，HKU 今日場蕭邦冠軍concert 肯定係佢彈，即刻買埋剩低嗰一張平價飛。大家放心，個hall絕對係正嘢嚟，我今日坐喺樓上聽歌，完全接收晒Eric Lu嘅詮釋。以為個場在山頭好遠，其實搭地鐵落車之後搭兩次𨋢即達，唔駛日曬雨淋，缺點係完場後附近無嘢食啫。

其實呢場就似食廚師發板，唔知佢會彈乜嘢蕭邦嘅歌，直到演出日之前先至公佈。呢個安排，其實十幾年傅聰在香港開榮休concert試過咁樣做，當時我特登唔打開嗰份簡介，一邊聽一邊估佢跟住彈乜，幾刺激㗎。

今晚大部分曲目嘅結構嚴謹，篇幅較長，不華麗有深度，對小朋友較難理解嘅。坦白講，我唔明白Polonaise Fantasia 吧！因為我無似蕭邦嘅愛國情懷，當時聽傅聰最記得係後尾嗰段。而家做咗中年大叔，開始明白這首歌嘅思想。

Eric Lu 與十年前相比，沒再刻意忠於蕭邦。佢唔會將自己變成病到飛起嘅蕭邦，彈Noctrune 時把聲音變弱。我唔再研究佢點樣撚聲，而是為何採用這些聲音彈叩一段樂曲。

Eric Lu 今場encore 嘅歌，完全係我嘅回憶：Schubert Impromptus 係我考ATCL嘅歌，Goldberg Variation係我最後一年鋼琴課彈嘅歌（仲有一首係waltz op.42)。我慢慢睇到嗰啲畫花晒嘅樂譜， 雙手不由自主彈出嚟……掌聲拉番我返回現實，我仲想彈多一陣噃。