果然言中，final sem 一點唔易過。

由client揸住啞鈴，或是走到嗰部機嘅一刻，我至少要準確講出鍛鍊範圍、預備事項、關節動作及注意事項等。還有一啲估我唔到嘅提問，答嘅方式啱得嚟佢哋又可以接受。因此我理解上課嗰陣，同學仔問嘅問題，都比阿sir特登問番我哋轉頭，希望令我哋諗吓。

準備呢個考試同會考一樣痴線，將自己上堂手抄嘅note，由同學M取阿sir上堂 script請AI製筆記，連同同學D 拍上堂片段，整理成一叠cue card。嗰段時間頻頻做gym，口嗡嗡背番咭片裡面嘅嘢，人哋覺得呢條KamL無料扮PT，因為我上堂做mock present 出咗事，而且將來想做真PT。直到考試嗰陣，考官竟考問我堂上未曾問過嘅問題，我想了又想答咗一個唔知啱唔啱嘅答案出嚟，希望過關啩。

雖然我平時有做gym，但有啲機真係無用過，例如練小腿嘅提拉機，以及練hip嘅4 in 1機。以前在公司gym房有這部機，可惜換新機之後消失咗，就要特登去何文田嘅康文署健身室額外練習。考試嗰陣我抽中邊張咭即場講，考官將4合1分開四張咭好易中，偏偏我抽唔中。

記得以前，只會有小貓幾隻準時返學，而家逢星期日朝早竟然有大半班同學坐晒喺課室等上堂。我諗大家應該還有一顆好奇心，加上入讀機會難過中六合彩，幾辛苦都要努力讀書。

最意外嘅收穫，就係用咗學生證將MacBook同埋iPad來個大upgrade。講真我應該無乜機會用學生價買機，唔通等到阿女讀U先做咩。