一星期前得到新鮮熱辣嘅Cert in Fitness資格，真係易入難出，幾耐未試過讀到懷疑人生，不過有好多嘅裨益。而家梗係先claim CEF啦！然後幫其他人身體健康。

至於投資方面，今年係好開心嘅，過去咁多年冇乜增長到而家呢個情況，不過年紀大咗，唔可以再咁搏命。

情人節考咗車牌之後，我嘅MR3238未有著落嘅。考完試之後，無揸過車。真係要用嘅話，我會補吓鐘，安全至上，惟不作事前通知。

轉眼間，豚豚就快幼稚園畢業啦，升小學好好彩秒速攪掂。揀一間好學校好簡單，不過揀一間適合佢嘅學校唔容易。為咗呢個問題，我哋做咗兩年功課，到而家都仲喺度諗緊有冇做錯決定。無論點樣，升中靠自己啦。

而家每一次做喜歡的事，其實有好多顧慮，開頭好多時「無嘢」、「OK」、「夾到」嘅，做到半路出現好多變化，唔想嘥咗心機唔想退出，於是背後頂咗好多嘢，整整吓就會斷線跳掣。呢啲簡單嘅事，人人都做到，點解我唔做？或者成日想做好某啲事，明明已經做得好好，但係覺得唔滿意，一定要做到Excellence。讓時間做個界線，無論怎樣點都要收手。

為咗令身邊嘅人盡量攤出嚟講出真正嘅諗法，我先行將當日遇到嘅芝麻綠豆事同屋企人講，好似公司開catch up meeting咁。最近阿女間學校用過Apps操作機械人，好似明白我呢個programmer做緊嘅project。聽完大家嘅諗法，我哋有辦法將啲事情排priorities ，可能係攤長個plan，甚至block。不過我選擇共存。

共存嘅其中一個方法係投其所好，例如豚豚玩緊田徑，同時間我在運動場跑步。出年暑假佢想再一次學游水，我就會學埋一份……其實今年佢學過但失敗（我當時都係）。明知咁細個學游水好難，但係佢都好想學，咪當練吓心肺。呢一度，我需要承擔責任的，因為我喺夏天生蛇，唔可以陪佢落水。

2025年正式完結，把這一年嘅體驗、得著及快樂等，延續到2026年啦。